本文重點
每逢年尾，焦點就落喺明年加人工嘅幅度，同埋派幾多花紅。太子記得，金融海嘯前，好多企業啲花紅真係多到你唔信，尤其係投行，閒閒哋都幾十個月花紅，家陣就真係難啲。不過，傳媒老友尋日八到，恒地（00012）老闆李兆基（四叔）就好慷慨，年尾會派花紅，表現好嘅甚至多到二十個月糧，手鬆程度拍得住當年嘅投行，收到嗰個認真肥仔。
明年平均加薪3%
四叔早排已經講咗，恒地員工明年會平均加薪約3%。聽講平均每人派多一個月糧做花紅，表現好嘅優秀員工更加可以獲派十至二十個月花紅添！
斷估收巨額花紅嘅應該都係銷售部嘅手足，而最難得嘅係，四叔收大錢之餘，亦不忘一班同佢打拚嘅員工，因為恒地上上下下嘅員工，就快一齊出發去海南島旅行。