周一港股跌173點，收報22,324點，唔少投行要員陸續放聖誕假去矣，大市成交縮到609億元，但從市況偏軟可以反映。上星期公布美國失業率意外回落，復甦露出第一線曙光，但仍及不上美元谷底抽升，增加美國提早加息的機會。在低成交配合下，短期美元反彈的確對股市走勢不利，但長遠美國經濟谷底反彈，中國出口及香港轉口經濟有利，企業盈利回升，假如奧巴馬能夠實現刺激就業承諾，經過陣痛之後，明年初股市展望更形樂觀。
統一購滙源有疑點
滙源果汁（01886）尋日急升19.1%，收報5.79元，原因係台灣傳媒引述台資食品供應商統一集團主管表示，有計劃明年增持滙源股權，兼且唔排除購併可能，以進一步擴大內地飲料市場份額。今年第一季可口可樂收購滙源的建議被商務部叫停，當時每股出價12.2元，比對今日四八折股價，難免惹人垂涎。
不過，呢類巨型購併，從來唔會事先張揚，上一次可樂出招，據聞滙源高層都係睇報紙至知，事前一點風聲都無，今次大鑼大鼓，係咪有咁大隻蛤乸隨街跳？
商務部以唔希望果汁市場出現壟斷為理由，一年前叫停可樂交易，點至可以自圓其說，讓市佔率更高的統一沾手？消息值唔值得跟進，不妨自己諗諗。
憧憬美國經濟復甦，走勢持續落後的工業股，近期有輪流炒迹象，生產手機及汽車液晶顯示屏，以及電子消費品的信利（00732），突見火燒冷灶，升0.5元，收報7.55元，成交300萬股或者2,226萬元，是七月以來最高紀錄。
常常覺得信利係冠捷（00903）及偉易達（00303）的混合體，同樣地，大家擁有優良往績紀錄，金融海嘯前，信利○四至○七年盈利介乎5.2億至7.02億元，只係○八年比較遜色，業績跌到2.6億元，但今年截至九月的首三季度業績，已賺2.85億元，超越去年全年，顯示業務也逐漸由海嘯低潮復甦過來。
毛利滑落成瑕疵
以一○年市盈率七倍計，跟近期走勢唔錯的偉易達十二倍比較，信利確有捧落後的條件，尤其現價比歷史估值十二倍折讓唔細，今年股價累積升82%，遠遠低於上述兩隻筆者心目中的「比較對手」。唯一瑕疵，可能係近年信利嘅毛利不斷下滑，由九九年的33.5%，落到○八年低潮的12.3%，可見產品持續有價格壓力。不過，今日炒落後者，不求天長地久，信利未必是長揸佳選，但若然成交配合，重返9至10元的機會存在。