今次中央經濟工作會議，強調保持宏觀經濟政策嘅連續性和穩定性，而策略重點係增加居民消費需求，穩步推進城鎮化，優化產業結構。然則，從政策因素出發，明年內需概念將繼續受投資者追捧，而具「城鎮化」概念嘅股份，如家電股、汽車股，食品消費股等，會繼續跑贏大市。
講開消費股，昨日飲料股表現大勇。台灣傳媒引述統一企業（00220）管理層表示，有意增持滙源果汁（01886），甚而提出購併，消息刺激滙源股價急升19%，而其他果汁股亦借勢炒上，海升果汁（00359）以全日最高位1.13元收市，升25%；安德利果汁（08259）升6.58%，報0.405元。
此外，大摩出報告唱好蒙牛乳業（02319），並將其目標價調高至32元，建議「增持」，消息刺激蒙牛股價上升，高位見28元，收報27.5元，升4%。阿莊喺19元買入嘅5萬股蒙牛，如今帳面利潤已超過四成，待股價突破30元，會考慮沽出獲利。
同獲「摩笛」唱好嘅，仲有富士康（02038），股價急升16.9%，報8.3元。阿莊亦曾喺6元水平短炒此股，都係喜歡其復甦概念。依家獲大行唱好，短線又剛剛破位，話唔定會閃電式叩9元關才有回吐。
平保落後唔怕買
上周三阿莊話太保（02601）即將招股，可炒影子股中國人壽（02628），果然捉正路數，國壽昨日曾高見41.45元，而提及嘅中壽美林認購證（17905）及中壽瑞銀牛（68193），若上周有跟進，回報都唔錯。反觀屬同類股嘅平保（02318），呢轉表現有點落後，現水平唔怕買。
哥本哈根氣候大會昨日召開，據聞中國嘅減排目標高居榜首。事實上，推動節能環保已成為中國嘅「國策」，喺環保及城鎮化雙概念支持下，環保水務股前景看俏。
講開呢類股，北控水務（00371）上月宣布斥資逾5,000萬元，增購北控中科成環保至92%，股價炒上2.8元後回軟，喺2.4至2.6元水平反覆整固，已有大半個月。
中科成環保喺內地設有多間水廠，總處理能力每日達318萬噸，乃內地其中一家大型污水處理企業。今次增持，有助北控水務加強對中科成環保嘅股權控制，亦與公司核心發展環保水務嘅策略一致。
查實，自去年收購中科成環保後，北控水務喺短時間內已轉型，未來公司會喺母公司北京控股（00392）嘅支持下，快高長大，成龍頭水務股。近期二、三線股交投活躍，睇北控水務嘅股價走勢，相信整固過後隨時又會再落鑊大炒，下站目標衝3至3.1元，止蝕位2.35元。