退市憂慮嚇窒美股

美國耗資萬億美元振興經濟，就業市場有改善本來是好事一樁，至少有助消費信心恢復，惠及年終前嘅零售市道，也直接對亞洲的出口經濟有利，但到底足唔足夠抵銷聯儲局退市來得更早的預期，從道指高開走低，埋單無乜升跌，反映好淡雙方仲係各有見解，但從當日能源及資源股插水（擔心美元反彈），反之工業、資訊科技及金融股連漲，肯定係短期投資取捨的一個寫照。

十月份內地汽車銷售數據令一眾淡友跌晒眼鏡，汽車股全無疲態，根本跌唔落。史提芬趁周末時間，搵吓有冇落後的滄海遺珠，本來駿威（00203）表現四平八穩，但今年以來股價累積只升1.1倍，不但跑輸東風（00489）的3.8倍，就連只係將蝕錢生意賣番畀母公司的華晨（01114）都升4.3倍，威過佢一條街。

毋須依賴政策扶持

駿威主要收入來自與日本本田合作的聯營公司，佔五成股益，駿威優點係本田汽車的款式及受歡迎程度，在內地一向名列前茅，但同樣地這亦係駿威缺點，因其他滯銷車廠得到政府補貼車主計劃幫忙，產銷量大增，反而駿威本身一向貨如輪轉，旗下雅閣及奧賽德MPV系列銷情向來唔錯，有冇政策扶持分別唔大，捧場客惟有寄望生產設備使用率達九成的駿威，兩間廠房的擴產計劃明年完成後，將年產能力由36萬架提升三分之一，去到48萬架，從而帶動業績有突飛猛進的表現。

要數業績表現最平穩的汽車股，非駿威莫屬。○四至○八年，盈利介乎20億至23.2億元（人民幣．下同），證券界預測今、明兩年會緩步攀上22.3億元及24.75億元，以386億港元市值計，一○年市盈率13.7倍，同東風睇齊。回顧○七年中資股高峰期與○八年海嘯，估值最高見過18倍，最低也試過只得3.9倍，相比起伏不大的盈利，可見投機者在極端時間內作極端荒謬的決定。

撫心自問，到底要買一隻政府政策傾斜才可交出佳績，抑或本身底子好、經營有道的企業？按估值而言，駿威現價肯定唔平，但也不算昂貴。如果未來幾個月，能有一成至一成五的調整，回到4.5元附近，就更加理想。