內地加快淘汰落後產能，重點控制電力、煤炭、鋼鐵、水泥、有色金屬、焦炭、造紙、皮革及印染九大行業，措施包括嚴禁向落後產能和嚴重過剩產能建設項目提供土地、抑制高消費、高排放產品市場需求、嚴格限制出口，而淘汰落後產能目標完成狀況，將列入地方政府政績考核之列。

今次中央執行「調結構」政策，已坐擁龍頭地位嘅大型上市企業，長遠將成淘汰賽贏家，圍繞行業嘅購併活動亦會增加，投資者揸住「唔大唔買」嘅宗旨選股便可。

前日阿莊買入短炒嘅威勝集團（03393），昨早曾高見8.65元，阿莊見升得太急，故以平均價8.46元沽出5萬股，短炒獲利5.5萬元，會再留意上車機會。

內地消息指，中國食品（00506）旗下嘅中糧食品營銷，在本月初就旗下「福臨門」食油全面漲價發通知。今年上半年，廚房食品業務佔中食總收入約31%，其中包括以「福臨門」等品牌在內地分銷及銷售小包裝食用油和調味品。打從去年底食用油價格管制解除後，旗下食用油銷量及毛利率均已回復正常水平，加上原材料價格穩定，公司優化產品結構收效，上半年該類業務毛利率同比增加3.6個百分點，至11.9%。

食油業務備受看好

若近期食用油提價嘅消息屬實，對中食當然係利好消息。再講，待明年母公司於天津興建包括年產160萬噸食用油嘅綜合生產基地落成後，將有利中食拓展東北及華北市場，所以呢瓣業務前景可睇好。

講開中食，近期中糧集團旗下一門三傑─中糧包裝（00906）、中糧控股（00606）以及中食（嚴格嚟講可以計埋蒙牛乳業（02319）成「四傑」），股價排隊「坐火箭」，中食係最後起步嘅一員，近周升勢甚速，大有後發先至之勢，昨日其股價以全日高位7.22元收市，乃○七年首季以來嘅新高。

雖然本周升勢確實有點急，但別期望回吐幅度太大，企得穩喺6.8元水平就可動手，呢轉8元應該冇走雞，10日線支持喺6.4元。