內地家電股股價不斷上升，海爾電器（01169）昨升9.5%；創維（00751）升6.4%；TCL多媒體（01070）升7.7%。睇見呢批家電股嘅走勢圖，仲以為佢哋係賣黃金！老實講，今年政策市對於家電股嘅利好作用，已反映喺股價上，畢竟家電係相對耐用嘅消費品，相信明年難以維持今年嘅銷售增速，所以阿莊唔會入市高追。
個人遊概念股發威
昨日提及嘅威勝集團（03393）表現唔錯，開市後反覆向上，全日高位7.15元，但論表現都係周一見報嘅莎莎國際（00178）勁啲，再升6.7%。查實唔只莎莎，昨日六福（00590）及卓悅（00653）分別升15%及7%，市場炒作本月中起深圳非廣東籍常住居民，可在深圳申請來港「個人遊」簽證。食住呢條水，餐飲、酒店股亦值得關注，昨日稻香控股（00573）呈旗形突破，遠東發展（00035）走勢亦對辦，有心唔怕遲！
中油香港（00135）配股籌集37億元，擬用於收購下游天然氣分銷資產，昨日股價一度升至9.3元。睇呢啲價位配股都有人接，肯定仲有好消息跟尾，中線目標可上移至11至12元。
太保招股牽動炒風
本月尚有多隻新股進行招股活動，其中一隻係中國第三大壽險公司太平洋保險。消息指太保將於下周一路演，翌日招股，本月廿三日掛牌。太保A股（601601）早喺○七年底已掛牌，即係話有現成A股嘅參考價。睇番呢輪先A後H嘅新股表現遜色，與其入大飛「抽獎」，倒不如在其招股期間，博吓炒影子股，故建議睇番隻中國人壽（02628）。
國壽股價上周四一度衝上40.9元，惜翌日被全球大跌市拖低股價，本周一回穩，昨日收報39.05元。純睇走勢，短線反彈成氣候，應可再闖40元大關，短炒目標上試45至46元阻力位，止蝕定喺上周五低位37.3元。若嫌正股價位太大，想刀仔鋸大樹，可睇相關衍生工具，認購證可留意中壽美林認購（17905），博轉價內證；牛證可留意中壽瑞銀牛（68193）。