本文重點
香港人對日本嘢食一向都趨之若鶩，尤其魚生同壽司，所以日本食店喺香港開到成行成市，不過要突圍而出，就一定要有噱頭，好似成日搞搞新意思嘅板長壽司老闆鄭威濤（Ricky），尋日同太子講，原來佢啱啱同米蘭站老闆姚君達，夾份喺灣仔買咗幾層舖，諗住搞日本最流行嘅飲食同購物Crossover。
佢哋兩個早前以2.45億元向爪哇控股（00251）買咗灣仔駿逸峰地下、1樓及2樓零售樓面，打算喺上址開設提供壽司料理及名牌百貨旗艦店。佢笑笑口咁話，今次係佢咁大個仔最大宗金額嘅物業投資，估計共約3.4億元。由於香港暫時未有同類型店舖，所以對新店生意充滿信心。
夥米蘭站老闆Crossover
Ricky一向都好有生意頭腦，佢話香港人生活繁忙，排隊食完嘢之後，已經無時間再去其他地方shopping，有見及此，佢靈機一觸，睇準駿逸峰周圍人流多，加上附近上班一族消費力高，故決定喺上址打造飲食購物新試點。據悉，上址3層總樓面超過1.7萬方呎。