本文重點
遠離震央，杜拜金融危機對香港影響有多大，恐怕沒太多人可以在短短幾日內客觀地量度得到，但眼見股市在過去三季累積升幅驚人，估估吓，人嚇人，令唔少股票投資者亦不介意來一個大規模止賺，結果上周五恒指出現海嘯後首次的過千點跌市，恒指插了1,075點，收報21,134點，作為中東主要外資銀行之一嘅滙控（00005）更加誇張，一跌就7.6%，90元的上升裂口瞬間補回，計一計，滙控市值一日蒸發160億美元，金額等於該行在整個阿聯酋的所有商業貸款總和。
筆者雖然對中東市場唔算十分了解，但極端到要全數撥備嘅可能性仲係好低，尤其阿布扎比已表明會繼續出手相助，問題反而是，當今日港股大幅高開之後，邊類股票仲係值得捧場？事關短期內，相信中資銀行及內房股已經被中央可能修訂政策的緊箍咒限制，香港地產股亦然，如今連滙控、渣打（02888）都開始再被不明朗市場因素包圍，看來除了內需股可以置身事外，大孖沙同股民真係無太多的選擇。
回購手機業務有啟示
股市投資者，好聽啲講係數口精，唔好聽叫小心眼，對於上市公司將資產賣給大股東轉頭又買番，通常無乜好感。中國電腦一哥聯想（00992）就剛剛提出了一個並不討好的交易，將去年以1億美元賣給控股公司聯想集團的手機業務（聯想移動），以2億美元買番。筆者當然唔會懷疑聯想控股會為區區1億美元，甘冒令商譽蒙污的風險，但作為小股東難免會唔好受。
不過，基於聯想元老級人馬柳傳志剛剛重掌帥印，大有理由相信，在聯想電腦整體發展策略上，重新看重移動設備的發展，故有急急回購的意圖。
由資料得知，聯想移動上半年稅前溢利大約600萬美元，花旗證券估計收購這內地第三大手機生產商，出價等於預期市盈率十四倍左右，查實拿聯想本身一一年預期市盈率19.6倍相比，唔算高，仲反而幾合理。
未知看官會否有同感，隨着3G的普及，手提電話應用上愈來愈像一部流動個人電腦，與其要將隨身的tablet、netbook等疑似流動多媒體設備，與手機發展劃清界線，倒不如綜合一併研發來得更具效率。
君可見，美國蘋果電腦從桌上電腦演變成ipod，再到今日以iphone作為主要收入來源，今次交易，反映在柳傳志的掌舵下，聯想野心不小，這1億美元的學費絕對值得。