本文重點
外圍市場風高浪急，選股宜集中睇本地股或中資內需股，取其防守性會較強。莎莎（00178）最近宣布截至九月底止中期業績，營業額17.64億元，同比增長8.3%；純利1.23億元，同比增長40.9%；每股盈利8.9仙，派發中期息連特別股息合共每股9仙，表現冇得彈。
業績穩定息率可觀
近年莎莎喺香港嘅業務相對穩定，增長溫和，反觀內地營業額增長迅速，前景樂觀，亦為公司平添內需色彩。回說香港業務，由於自下月中開始，非粵籍深圳常住居民可在當地辦理個人遊簽注來港，估計合資格獲簽批來港旅遊嘅人口至少逾200萬人，將為香港帶來唔少新客源。如無意外，今個聖誕便見到成效，莎莎作為內地旅客熱門購物點，相信受益不淺。
受惠中期業績表現良好，莎莎上周五股價逆市靠穩，收報4.45元，升1.14%。若然本年度業績回復至○七/○八年度水平，則現價預測市盈率十七倍，息率逾4厘，估值仍具吸引力，只係考慮到市況，可候4元邊上車。