28/11/2009

播放本新聞相關短片
查詢股票編號

鄭志剛人如其名要攞A

本文重點
啱啱「小登科」無耐嘅彤叔乖孫鄭志剛(Adrian)變身字母先生?大家唔好誤會,只係最近太子同新世界發展(00017)啲老友食飯,佢話原來好多同事經常叫佢做阿「A」,Adrian亦好鍾意呢個稱呼,除咗係佢英文名首個英文字母外,也可提醒自己積極進取,樣樣事做到最好。

老友又話,新婚不久嘅Adrian第一個Baby即將誕生!吓,咁快?老友即刻笑言,Adrian個Baby咪係尖沙咀河內道項目個商場K11囉,原來K11可望下月中開幕,Adrian好緊張。

講開Adrian平時做嘢咁大壓力,原來佢好鍾意飲茶紓壓,因為茶有甘味、有清香,就像細味人生。

矛盾就是創意

太子又八到,自小就好喜歡運動嘅Adrian,早前與大學同窗好友黃健華合作成功收購NBA騎士隊,佢佔15%股權,成為首位入主NBA嘅香港老闆。

Adrian亦好鍾意寫嘢,佢會於集團刊物《新語》寫稿,今期講同一班年輕人分享,原來創意總是躲在「魚與熊掌」之間,而矛盾就是創意之母。