尋日同調任咗華潤創業（00291）副董事總經理差唔多半年嘅黎汝雄傾偈，問佢喺內地長駐九年之後回歸香港，是否習慣？身為地道香港人嘅法蘭克（黎之洋名）竟然話自己仲未習慣同適應，點解呢？
內地工作多私人時間
原來佢話之前長駐無錫，經常都有工作同應酬，但最晏都係去到八點鐘就可以返屋企，仲有好多私人時間，收工之後仲可以約吓朋友唱吓K，而且一個禮拜都可以去做三次SPA。返到嚟香港就無呢支歌仔唱啦，每日連瞓覺嘅時間都未必夠，屋企仲細咗好多添。
不過，結束長達九年嘅中港兩地生活，可以享受天倫之樂，幾夜幾辛苦都值得嘅，唔怪得法蘭克講咩都係甜絲絲咁啦。