定價進取嘅民生銀行（01988）跌穿招股價，股市另一謎團，係以介紹形式上市嘅亞洲果業（00073），由開出第一口價51.25元插到落19.94元收市，一個早上市值由接近400億元縮水六成一去到154億元，係資訊不足？抑或股民唔做足功課？有排拗。睇番○九年亞果只係賺5億元左右，市盈率30.8倍，擔心朝早無睇清睇楚撲入去嘅股民，仲有得輸。

業績表現穩步回升

冠捷（00903）見光死，第三季業績曝光後，再跌0.33元，報4.52元，距離月初才做出的兩年新高5.98元，股價輾轉回落四分之一。高盛認為第三季賺4,000萬元（美元．下同），儘管包括原件銷售及政府補貼等一次收入，但出來數字已較預期3,000萬多一截。

由高盛報告，冠捷急跌似係藉好消息出貨，多於芬佬覺得業績差過預期洗倉。睇番按季數字，首季海嘯拖累下仍賺1,488萬元，其後兩季更回升到3,977萬元及3,950萬元，復甦明顯，雖然第三季毛利5.33%，對比首兩季的4.6%及6.55%稍稍失色，可是管理層預期第四季LCD Panel價格有5至10%回落空間。

筆者估計毛利至少可以維持。現價計今、明兩年預期市盈率為11.2倍及9.9倍，以龍頭級數工業股而言，估值都算合理，再跌水位應該有限。

新股東動向要留意

捧場客不妨留意冠捷的新股東動向，內地上市的長城電腦（深A000066）在市場密密吸納冠捷，過去一年的持股量由13.1%升到27%，買入價亦由1.33元升到3.68元。長城電腦隸屬中國電信信息產業公司，不妨上網睇睇，這官方機關來頭唔小，係中國最大IT企業，旗下「有關係」的中港兩地上市公司多達13間，員工數目逾7萬，業務由電腦設計、開發、製造，到軟件、系統電子商貿服務及電子工程設計等，應有盡有。

長城電腦最後一次在市場收集冠捷，係七月時以每股平均價3.682元買入227萬股，持股量達到27.02%（距離全面收購觸發點30%，只係差唔夠3%或者6,300萬股左右），同另一大股東、正打算退出非核心LCD生意的飛利浦，已經平起平坐，業內估計借花敬佛，只係遲早問題。

再睇另一邊廂，同樣靜靜起革命，電信信息產業公司過去一年，在街外掃入26.13%晶門科技（02878），同冠捷一樣，又係去到尷尬持股水平。一間係佔去全球LCD電視與顯示屏市場三成份額的硬件老大哥，另一間是在全球LCD顯示軟件設計市場，手執兩成份額的龍頭，新股東的葫蘆裏到底賣乜嘢藥，對兩間公司的未來，舉足輕重。