快餐股大家樂（00341）宣布截至九月底止中期純利2.21億元，同比增長10.3%，中期息每股17仙，主要受惠食品成本下降，而旗下北美業務已獲得經營溢利，長遠而言有望成為另一增長點。老實講，金融海嘯以來，商舖租金由低位反彈，升咗唔少，加上同行競爭激烈，大家樂嘅經營表現已經可以話係相當唔錯，加上股息回報穩定，值得長線投資者繼續捧場。

內地傳媒報道，國務院總理溫家寶近日主持常務會議，研究部署應對氣候變化工作，已決定到二○年內地控制溫室氣體排放嘅行動目標，並提出相應嘅政策措施和行動，包括到二○年，內地單位國內生產總值二氧化碳排放，比○五年下降40至45%，並會大力發展可再生能源，積極推進核電建設等行動。既然國策明確不過，再生能源概念可望長炒長有。

國策明確長炒長有

講開再生能源，昨日相關股份普遍隨大市回落，惟見中電新能源（00735）嘅走勢較為突出，高位曾見0.67元，收市報0.65元，升4.8%，成交1.21億元。

中電新能源有分屬五大發電集團之一嘅中國電力（02380）作為主要股東，背景不用多說，截至六月底止，公司擁有兩個風電、兩個水電、一個生物質發電、一個垃圾發電、一個天然氣及燃油發電，以及一個燃煤發電項目，權益裝機容量達到815兆瓦，係不折不扣嘅再生能源股，難得各項業務均已開始錄得經營溢利。受惠國策支持，未來可加快發展步伐，股價炒上只係時間問題。

睇走勢，該股短線呈突破，成交配合，若升勢持續，可望上試六月高位0.78元，回吐守0.57元。