本文重點
香港一向主張男女平等，不過，尋日非牟利機構公益企業聯同英國克蘭菲爾德管理學院，發表嘅「二○○九年度恒生指數企業女性董事概況」研究報告就指出，香港恒指42家成分股企業，合共585個董事職位之中，只有52個（8.9%）由女性擔任。太子對於呢個咁低嘅比例，都覺得幾驚訝。
建行最多女董事
研究報告仲包括一個「企業女性董事比例排行榜」，出乎意料，頭十位嘅企業之中，中資公司佔咗一半，排頭位嘅係建設銀行，女性董事會成員佔比29.4%。相反，外資公司就只有太古打入十大。
贊助呢項研究嘅渣打銀行，佢哋亞洲區行政總裁白承睿話，渣打喺香港有5,300名員工，其中58%係女性，而高管當中，女性佔比係33%，充分體現性別多元化。
佢仲好自豪咁話，渣打之所以安然度過金融海嘯，其中一個原因係佢哋了解不同市場、文化同埋性別嘅差異，以切合不同客戶所需。