有讀者問阿莊，舊年四月開始揸住嘅北京控股（00392），已經升咗六成，幾時先至食胡。阿莊嘅回應係，北控現價估值唔算高，加上燃氣股氣氛良好，除非對後市睇法轉為負面，要減持股票，又或者搵到其他更可取嘅投資對象，否則都係傾向一動不如一靜。

放大圖片

放大圖片

講到組合持股，阿莊想講吓隻平保（02318）。收購富通一役，確實對平保造成打擊，但經一事，長一智，公司回歸基本步，聚焦內地市場，早前宣布入股深發展，便屬一例，對此市場亦見受落。

今年首十個月，平保嘅未經審計保費收入合共1,456億元人民幣，同比增長34%，可見核心業務受惠經濟復甦及股市回升，且增幅高於行業平均水平。截至九月底，平保嘅壽險及財險市場佔有率分別為16.8%及12.3%，以公司嘅銷售網絡和規模，有條件繼續擴大市佔率。

明年經營環境向好

A股市場表現，直接影響平保嘅投資收益。阿莊亦唔排除明年A股走勢會較今年波動，增加投資難度，但整體方向仍然向上，加上未來一、兩年，內地存款息率頗大機會向上，內地債券收益率持續走低嘅情況亦會逆轉，雖然預期升勢只屬平穩，但對於平保嘅投資收益，亦起着正面嘅作用，故展望明年經營環境大致向好。

此外，平保跟主要股東之一嘅滙控（00005）關係密切。明年滙控將赴內地國際版掛牌，唔排除未來二者喺拓展內地金融市場上會有更多合作機會。

雨過天青，近期野村、摩通、花旗及高盛先行就包括平保等內地保險股發出研究報告，取態正面。昨日平保股價創五十二周高位76元，收報75.6元，升3.28%。考慮到行業及公司消息流向好，近日股價升勢又有成交配合，若月底中央經濟工作會議對明年宏觀經濟政策展望未有重大負面消息，兩地股市喺短線整固過後，將再次挑戰高位，作為權重股嘅平保，股價可反覆向85元推進。除正股外，亦可以留意相關嘅衍生工具。