本文重點
中國人一向篤信風水，但太子估唔到，原來外國人同樣對風水好有研究。渣打尋日開放佢哋位於國金二期嘅新交易室畀傳媒參觀，仲由渣打香港環球市場地區主管彭達賢親自導賞。喺佢哋嘅辦公室，太子就見到寓意「水為財」嘅金魚缸。
渣打新交易室，位於國金二期12樓及15樓，佔地3.5萬平方呎，可容納440名員工，主要從事證券銷售、外匯等交易。彭達賢帶領傳媒參觀15樓，邊行邊介紹每一個部門，作為導賞員嘅佢十分稱職。
每層一個金魚缸
行到休息室附近，彭達賢專登停低，畀傳媒欣賞一下擺放喺嗰度嘅金魚缸，裏面養住好多鮮艷奪目嘅熱帶魚。彭達賢笑笑口咁話，佢哋兩層辦公室都有一個金魚缸作為風水擺設。
香港係渣打股票業務嘅全球樞紐，依家生意愈做愈大，除咗進駐國金二期開設呢個屬於渣打全球最大嘅交易室（以每層樓面計），仲有環球市場全球主管坐鎮，自然希望財源源滾滾來啦！