大價股牛皮，炒家焦點放喺二、三線股身上。繼上周五中信21世紀（00241）單日升幅超過一倍之後，昨日又有一隻倍升嘅股份，就係萬事昌國際（00898），收報0.43元，升1.2倍，成交919萬元。
講到細價股，早前阿莊亦提及過信佳國際（00912）。呢隻股主要做電子消費品業務，截至今年三月底止，年度業績未受金融海嘯太大影響，純利按年增兩成至2,492萬元，息率高達6.7厘，截至三月底止每股NAV1.23元，係一隻傳統高息工業股。
由於信利嘅寵物培訓器材以及互動教學產品銷售穩增，相信中期業績可保持穩步增長，保守假設下月公布截至九月底中期業績增長15%至1,500萬元，全年度預測純利3,000萬元，以目前市值2.04億元計算，預測市盈率僅6.8倍，兼可享高息。雖然係一隻平凡嘅工業股，但論估值，與其炒啲唔知升咩嘅股仔，呢隻股來得踏實。
龍源帶動影子效應
此外，近期新股招股活動熱鬧非常，由大摩做保薦人嘅亞洲最大風力發電企業—龍源電力（00916），聽講將於本周五開始招股，而受到相關利好氣氛帶動，現成嘅風電股亦受追捧，昨見中傳動（00658）高位見19.34元，收報19.28元，升6.7%；中電新能源（00735）一度升至0.61元，收報0.59元，升3.5%。
另一隻可留意嘅風電股係中國風電（00182），昨日股價以大成交突破1元關，高位見1.03元，收報1.01元，升5.2%。由於短線走勢呈突破，可以追入，今轉博上1.2元，穿0.96元止蝕。
中國風電從事投資及營運風電廠，係一隻百分百風電股。今年上半年純利達1.07億元，同比增長98%。截至九月底止，公司已投資建設16間風電廠，權益裝機容量531MW，其中7間已併網發電，9間處於建設階段，另已開始其他4間風電廠嘅前期施工準備工作，相信未來公司收益將呈快速增長。
內地風資源甚為豐富，估計可開發的風資源達到10億千瓦以上，但目前已開發的風資源尚不足可開發總量嘅2%，反映行業發展潛力非常龐大。中國風電身處高增長行業，而且已經建立盈利基礎，股價短線有炒味之外，長線亦可望隨著業務一起快高長大，可謂長短皆宜。