本文重點
前排冷鋒襲港，太子每日都只想瞓喺被窩裏面取暖。不過，呢幾日就畀太子知道有個朋友竟然無懼寒風參加毅行者，捱住兩度低溫，仲要負傷上陣行足100公里，邊個咁巴閉？咪就係恒生（00011）助理總經理張樹槐（Walter）囉！
冒嚴寒帶傷上陣
不嬲都知Walter鍾意運動，特別係跑馬拉松。不過，就估唔到佢今年玩埋毅行者咁激。原來佢今次仲係第一次參加！Walter賽前積極備戰，可惜喺三個星期前，扭傷左腳踝。
喺比賽當日，Walter要帶傷上陣，佢仲要面對冷鋒嘅考驗。Walter同佢另外三位馬拉松好手頂硬上，充分發揮「毅行者精神」繼續前行，征服足足二十幾個山頭。
Walter今次咁落力，除咗佢本身夠堅強外，原來都得到成班恒生高層鼎力支持，兼且做埋贊助人。