阿莊喺周二加注嘅中國南車（01766）走勢對辦，昨日股價逆市向上，高位曾做5.15元，收報5.12元，升1.99%。投行早已預期明年南車將進入業務高增長期，經過歷時大半年嘅收集，係時候開車。上月底德銀發報告唱好，目標價睇5.5元，首站就先睇呢個位。

喺九月上市嘅國藥控股（01099）（招股價16元），憑着醫改概念，股價反覆向上，上月底股價高見29.45元後才現整固，惟近周股價喺25元現承接，昨日收報26.65元，不排除調整經已完成，又可以留意翻兜機會。

國藥主要從事醫藥分銷、零售及其他相關業務，今年上半年中期純利4.76億元人民幣，同比增長44.6%。公司一個大賣點，係已建立一個覆蓋全國十九個省、市及自治區嘅分銷網絡，直接客戶包括4,791家醫院，佔全國醫院數目嘅38.5%，另有逾2.67萬家其他客戶，乃來自各地嘅醫藥分銷商、零售藥店及其他醫療保健機構，分銷業務佔其總收入93%。

醫藥零售大有可為

不過，公司喺全國藥品分銷市場佔有率才11%，未來將繼續擴大市場份額，透過規模效益降低分銷成本，加強競爭力。

此外，醫藥零售業佔國藥總收入比例不到3%，但喺醫改嘅大趨勢之下，零售市場大有可為，隨着旗下直營店和加盟店數目不斷增加，發展潛力絕不遜色。

早前摩根士丹利發表報告，將國藥嘅目標價定喺30元，基本上上月底經已實現。新鮮滾熱辣嘅有前日摩根大通發表嘅報告，重申給予國藥「跑贏大市」評級，明年底目標價定喺36元，事關經過上市集資後，公司消除了資金壓力，估計明年銷售額按年增長將擴大至33%，到二○一二年銷售額將突破1,000億元人民幣。

喺現成股份之中，類似國藥咁嘅規模和概念嘅股份絕無僅有，站喺供求角度，可供投資者選擇的確實唔多。既已成基金寵兒，估值享有溢價實不足奇，如今有大、細摩先後唱好，短線走勢亦現反彈勢頭，相信股價可再試30元阻力位。