尋日中移舉行「藍海戰術」發布會，王建宙話新業務對公司依家係前所未有咁重要，佢提到依家中移嘅覆蓋已經係無處不在，總共有50幾萬個基塔。上個月倫敦市長就搵咗一班專家去倫敦畀意見，睇吓倫敦喺基建上面有乜嘢可以改善，迎接二○一二年嘅奧運。王建宙都係被邀之列。

好多大計 唔易退休

佢巡完場之後，就同市長講，倫敦個地鐵好靚，但係就收唔到電話，到咗奧運會好唔掂，以佢經驗通訊對奧運非常重要，而中國就完全唔同，唔止地鐵收到、升降機收到、地下室一樣收到，就算係喜馬拉雅山都無問題。倫敦市市長就話佢哋搞好耐都係做唔到，所以盛意拳拳咁叫中移交計劃書。

王總已經六十歲，但依然要周圍頻撲，忙到無停手。展望將來佢除咗要加快開拓新業務之外，仲要好好搞埋4G，所以相信都未必會咁快退休。