港股上周五有好表現，恒指彈上21,829點收市，勁升350點，上證連升多日，國企股繼續有支持，國指再升211點，收於13,017點，市場氣氛保持良好，主板成交亦有644億元。
雖然全球經濟仍差，但唔代表股市升唔起，歐美各國齊印銀紙，在預期通脹下，資金從銀行流入追逐資產，股市、樓市、資源價格齊齊急升，恒指雖在22,000點遇上輕微阻力，但上周已經重拾升勢，不過衍生市場未見認同，上周五輪場及牛熊證市場均見成交收縮，輪場成交降至只有59.9億元，而牛熊證同樣人氣低迷，只得62億元成交。至於輪商取向方面，過去一個多月，輪商持續派發恒牛證，其街貨量已升至15億份，在高街貨量及再向上空間有限下，現時入市更應小心為上。
A股回升，對中國人壽（02628）業績幫助甚大，後市可看高一線，中壽荷銀購（17751），行使價為37.68元，溢價5.2%而提供10.8倍槓桿，數據上不下於任何牛證，至少不用擔心回收問題，但要注意17751於十二月二十八日到期，小心末日輪效應，不應持貨過久。