上周安然度過超級議息周，港股先跌後回升，恒指喺穩守21,000點下，重上21,800點水平。論點數，恒指全周僅上升76點，成交亦未見明顯增加，但新股及二、三線股交投十分活躍，投資者一於炒股唔炒市！
上周阿莊分兩注買入嘅中國鐵鈦（00893），走勢強勁，上周五高位見4.81元，收報4.72元。大戶收齊貨，股價如入無人之境，若嚟緊市況利好，短線未必喺5元關止步，會睇情況定去留。
聯想佳績抵捧場
聯想集團（00992）宣布上季扭轉虧損局面，截至九月底止三個月錄得盈利5,308萬美元，同比增長1.2倍，表現值得一讚，亦帶動股價向上。雖然月初阿莊曾表示，會等候 回落至4元水平至翻兜，但上周五見其季度業績咁好，亦忍唔住手，喺4.45元買入10萬股。
今年八月內地A股調整，九月初觸底回揚，至今滬綜指每月高位不斷上移。若然呢個趨勢持續，相信年底前可再試3,400至3,500點阻力區。國企指數方面，短期亦有勢再試上月高位13,325點，事關當本周初細價股炒得差唔多，相信好大機會又輪到國指成分股發圍。
講起國企股，上周煤炭股明顯見有資金流入，股價迭創五十二周高位，兗煤（01171）高見13.3元、中煤能源（01898）見12.5元、中國神華（01088）橫行兩周後，終現突破，上周五高位見37.2元，收報37.1元，升1.15元。
大行睇好煤炭股
踏入冬季，又係燃煤取暖嘅季節，配合全國經濟持續復甦，帶動工業煤炭需求上升，再看去年同期行業數據比較基數較低，季內煤炭銷售料有好表現，大戶睇好煤炭股，自必有其道理。而喺三隻龍頭煤炭股之中，神華表現相對落後，破位跟進，博上43元，止蝕位34元。