城電全年成績表將於今日曝光，昨日的交投異動，吸引史提芬注意。睇番中期業績，已經見到長途電話、固網及寬頻三線發展的城電，開始步入收成期，截至二月底止的半年營業額及純利，分別上升16%及57.7%，去到7.21億元及7,537萬元。

發盈喜多賺五成

九月下旬，殺價超人曾經發盈喜，估計全年營業額，扣除利息、折舊及攤銷前利潤（EBITDA）及純利，會分別有10%、30%及50%以上增長，按截至○八年八月底止的1.25億元全年純利計，今期成績表至少賺1.875億元（即單是下半年已賺1.12億元），目前市值17.1億元，PE一啲都唔高，只得9.1倍。

投資高峰期已過

眾所周知，電訊業前期投資高，但係當電訊系統、機樓、光纖網絡等前期投入、折舊封項後，即使客戶及營業額增長唔大，收入減開支後，營運利潤一樣可以水漲船高，好似印銀紙一樣。睇番城電，即使電訊市場飽和乃是不爭事實，營業額無大驚喜，○四至○八年度僅介乎11.7億至13億元一成水位上落（今年預期14.33億元可真是大突破），不過都要多得最大對手電盈（00008）主理人無心戀戰，淨係諗住私有化套現，未有打價格戰將城電逼死。

城電家用光纖網絡完成得八八九九，商用建網開始，預期支出有限，睇番折舊與攤薄高峰期早於○六年出現，由2.9億元跌到○七年的2.73億，再跌到○八年的2.43億，亦係過去兩年業績三級跳，由年賺2,887萬元，變成1.25億再變到1.875億的原因。中期現金增加至5.5億元，負債6.8億，以半年1.33億的正現金流，相信今日成績表有機會變成淨現金，無債、再唔需要大額投入，主理人無意私有化又否認賣盤嘅城電，似乎具備派高息條件，唔怕貨疏可以留意。