講起細價股炒風，近日一隻被勁炒嘅股仔係彩星玩具（00869），本周一復牌股價急升，周二現整固，昨日中午前股價仍在0.5至0.6元水平徘徊，冷不妨下午炒家埋位，升勢甚速，高位曾見1.15元，收報0.99元，升83%，成交5,922萬元。呢期細價股一係唔炒，一炒就係「球來球往」，只要心口有個「勇」字，就自然搵到食！

放大圖片

放大圖片

哥本哈根會議將於下月上旬召開，市場預期本月美國總統奧巴馬訪華，中、美兩國將會就環保問題達成一些合作協議。近日市場亦盛傳，內地有關新能源產業嘅振興方案將於短期內出台，故本月宜緊盯再生能源板塊。

回說昨日異動嘅林業股，除咗中國林大及中國木業之外，其實三林環球（03938）都好值得博，氣氛配合嘅話，短線快見五十二周高位0.74元。此外，全國林紙一體化已成國策，在紙業股之中，近年積極打造「林漿紙一體化」產業鏈嘅晨鳴紙業（01812），亦可以高度關注。

造紙行業安度低潮

市場數據顯示，內地造紙行業已於上半年安度低潮，展望未來，市場只會更加之「歸邊」，強者愈強。晨鳴一項取勝之處，係公司積極投資上游業務，以解決長年制約公司發展嘅原材料瓶頸問題。

去年公司上市集資，主要使用於發展湛江木漿項目及配套原料林基地，另正加快湖北林業項目基地建設。長遠而言，這些項目嘅順利推進，將足以令公司拋離其他競爭對手。

再看公司嘅營運數據，雖然今年首三季淨利潤同比下跌63%至4.62億元（人民幣．下同），但單係第三季度淨利潤達到3.04億元，可見業務復甦速度正在加快，應視為好消息。保守假設第四季淨利潤較第三季增長一成，則全年淨利潤料近8億元。明年湛江項目完工，將有效降低公司嘅原材料採購成本，配合行業復甦，盈利恢復增長指日可待，現價估值吸引。

入市策略方面，短線可在4.8至6.2元炒上落，若然有信心作中長線持有，目標可重越7元水平。