本文重點
一場金融海嘯過後，好多銀行家在短短一年多，見識過唔少風風浪浪，依家個環境似乎稍為平靜落嚟，估唔到花旗香港區行長章晟曼轉過頭又話要去接近大海，仲要執垃圾！咩事？究竟係咪花旗有啲咩風吹草動？
大家千祈唔使擔心，章晟曼只不過係響應花旗星期六舉辦嘅全球義工日。好多大集團都會搞義工日，提升員工士氣，又省靚自己招牌。
超過二千人參加
花旗香港亦唔例外，今年已經係第四屆搞全球義工日，而且義工人數仲刷新紀錄，有成超過二千人咁多，真係令人興奮。
章晟曼話今個星期六就會同花旗集團北亞區行政總裁鮑史汶，去龍鼓灘海岸清理垃圾。環球個人銀行服務行政總裁及總經理盧韋柏，會去深水埗同小學生玩花式跳繩。資本市場及企業銀行業務總裁麥永森，就會同小朋友利用廢物做啲小手工。