市況偏靜，炒家繼續轉攻新股，昨日利邦（00891）首日掛牌，朝早U時段以3元成交咗30.9球，10點開市首宗交易以3元成咗一手，第二宗同樣係一手嘅交易成交價卻只得2.24元。不過，44分鐘後，股價重上3元樓上，11點前見全日高位3.21元，之後便反覆回落，收報2.46元，仍較招股價升49%，全日平均成交價2.58元，成交金額達15.4億元，公司市值為37億元。若非大炒家所為，真係解釋唔到呢個現象。
唔知係咪因為班炒家有新搞作對象，故見阿莊昨日提及嘅中國鐵鈦（00893）早段衝過4.39元後便見獲利回吐，低位見4.03元，收報4.06元，跌5%。阿莊相信升浪未完，遂以4.1元先買入6萬股。
過去半年，中資股大翻身唔在講，就連估值低迷嘅工業股，都累積唔小升幅，滄海遺珠，所餘無幾。近日阿莊留意緊隻信佳（00912），公司專做消費電子產品，由於產品較獨特，去年度業績未受金融海嘯影響，現價市盈率6.6倍，息率7.6厘，較NAV折讓逾四成。若然嚟緊中期業績對辦，應該有望收窄折讓，可惜交投不算活躍，只能抱小注燒冷灶心態。
電價改革空穴來風
回說中資股，過去兩周電力股表現疲弱。不過，近日內地傳媒報道，電價改革可能喺本月內有新進展，正所謂「空穴來風」，可以留意博電力股反彈嘅機會。華潤電力（00836）股價由上月下旬高位18.16元，反覆回落至本周一低位15.52元，調整幅度達14.5%。昨日股價終見反彈，收報15.94元，升2.18%，成交額增至5.13億元，交投配合。
技術上，潤電過去兩周跌勢，扭轉咗去年末季以來嘅上升趨勢。但平心而論，見其營商環境未有重大改變，反而煤價穩定、經濟復甦帶動電力需求持續回升，公司嘅營運表現亦一直優於行業平均水平。然則近月沽壓，不排除與基金從不同板塊輪流轉有關。
展望第四季有關電價改革嘅消息，將為電力股反攻帶來動力，畢竟潤電股價已回落至接近今年次季以來嘅低位，若股價持續回穩，可確認完成調整，反彈阻力喺17元，止蝕15元。