物業市場向來係資本主義社會裏面，一個相當重要的財富累積及投資商品，一向以來，政府都係愈少理愈好，唔善忘嘅，應該記得董伯八萬五政策，令港人財富大萎縮，經濟急轉直下，期間社會怨氣大增，政策也不了了之。

自由經濟理念認為，供應與需求長遠會找到平衡點，如果價格高得離譜，需求自然回落，價格也因而下跌。不過，豪宅或者係例外，因為佔香港住宅比例甚低，大約只係整體私樓的0.3%，只要有少量「傻人」喜歡，像古董一樣唔計價買入，都足以做出天價，政府管嚟無謂。講到底，政府一方面要以勾地控制供應，另一方面又唔想豪宅畀人炒高，是不可能的任務，定期賣地或者降低勾地門檻，等發展商可以增加平民百姓買得起的「非豪住宅」，方為正路。

內地項目屆收成期

唔經唔覺，樓價經已重返○七年金融海嘯前水平，或者真係股市投資者要比樓市炒家「審慎」，地產股股價普遍仍低於○七年高峰水平，好似信置（00083）較高位29.8元，仍低44%，新地（00016）較175.4元高位，低27.7%，恒地（00012）較79.8元高位，低27.4%，恒隆集團（00010）最叻，但較高位48.4元仍要低15.5%。筆者深信港美今浪會比大部分國家更遲步入加息周期，而在內地經濟帶動下，明年本地經濟會明顯復甦，相信地產股遲早逼近甚至超越○七年水平。

恒隆主席陳啟宗就樓市發表肺腑之言，坊間暗暗叫好。筆者一向認為恒隆太穩陣，堅持唔平唔補充土儲，但近年內地發展成績有目共睹，從股價在金融海嘯後的修復能力，可見一二。論估值，預期市盈率16.8倍唔算平。不過，市帳率1.3倍，比○七年高峰的2.2倍折讓四成。兩個理由，令筆者相信恒隆未來半年有作為，一係手上貨尾集中豪宅地段，其次係市場似乎低估未來兩三年內地物業項目步入收成期的得着。