本文重點
本地地產股回吐壓力不大，港股昨日午後一度倒升，惜中資電訊股及大笨象（00005）唔多爭氣，最後恒指還是低收作結。依照紀錄，每年內地第三季度GDP數據亮相後，好快又到官方公布明年GDP增長預測，市場如何解讀最新宏觀政策，對人民幣走向有何啟示，將左右後市去向。
金管局跟銀行會面，有消息話當局擬限制豪宅按揭成數，但其實買得起二、三千萬一間樓嘅買家，多數係「一炮過」付款，咁調整豪宅按揭成數，又有咩意義呢？
阿莊亦認為，依家普通市民唔係完全負擔唔起樓價，只係驚啲豪宅價再係咁升上去，最終連中、下價樓都會被拉高。
中國海外走勢對辦
要知道住屋開支佔香港打工仔家庭開支比例甚高，所以凡涉及樓市嘅問題，必須處理得好，否則可大可小。想起當年「八萬五」嘅破壞力，特區政府便應該好自為之。
組合中嘅中國海外（00688）走勢對辦，昨日高位見過18.72元。公司剛宣布首九個月營業額210億元，經營溢利71.8億元，截至九月底已完成全年銷售目標嘅93%，消息正面。
另外，昨日阿莊喺1.57元增持廈門港務（03378）15萬股，又喺36.15元買入1萬股中國人壽（02628），若然嚟緊內地保險股真係發力，會視乎情況再入場加注。
中資電訊股經營數據未有帶來驚喜，昨日相關股份股價雖然偏軟，但跌幅溫和，冇乜特別可以評論，只係見到昔日作為升市「火車頭」嘅中移（00941），如今股價平淡如水。
早前見有唔少好友掃入中移牛仔，諗住等大市破位，中移發力，牛仔飛天，誰知自己竟然跟升市無緣，白白浪費銀彈，所以話，揀股票必須要認清形勢，市場上只會係強者愈強，比亞迪（01211）跟騰訊（00700）都係好例子。
指數升到咁上下，又到二、三線股表演嘅時候，近日見到資金流入農業股，如第一拖拉機（00038），股價昨日創出五十二周新高，高位曾見3.53元，收市報3.48元，升5.1%，成交1,988萬股，交投配合。睇盤路，不難發現大戶手影。
論走勢，呢轉有權上衝4至4.2元區域，回吐支持喺3.2元，可小注順勢而為。