早前兩隻熱炒嘅概念股第一視頻（00082）同濱海投資（08035），經過一輪整固後，近日股價又再蠢蠢欲動，大有一觸即發嘅勢頭，果然第一視頻尋日率先飆上，高收1.82元，大升0.22元，而正熱身嘅濱海則收0.57元，升2仙。股價亦已一舉升穿10日同20日線阻力，STC（Slow）亦出現入貨訊號，一旦有大成交，升穿前高位0.64元，短期上升目標可達0.9元，值得追捧。
濱海重組後，現時大股東天津泰達係天津市經濟技術開發區管委會成立嘅國企，獲授權管理同經營國有資產，並已參與天津市嘅水務、能源、燃氣供應等公用事業，亦從事金融財政、基建、保險、工業、海洋發展以及房地產開發等，總資產值超逾1,300億元人民幣。
事實上，濱海未來發展已由天津市政府主導，將濱海做強做大，塑造成天津市對外開發嘅窗口公司，會係最終目標。基於濱海嘅重組已完成，注資行動相信隨時會展開，注入金額亦會相當龐大，預期每次注入資產會由數十億至百多億元，而每次注資亦將帶動股價上揚，前景值得憧憬。