21/10/2009

播放本新聞相關短片
查詢股票編號

股海實戰:廈門港務睇位加注

道指前晚重上1萬點關口,帶動日股及港股高收作結。恒指全日高位見22,451點,收報22,384點,升184點,成交741億元。阿莊所見,敢喺呢啲水平入場追貨嘅散戶唔多,部分經紀更怨升市搞到少咗生意做,故若以「散戶指數」作為指標,大市似乎尚未見頂。

前日跟進嘅富士康(02038),昨日升勢甚急,一度高見7.24元,收市報7.06元。由於升勢太急,有胡唔食罪大惡極,遂以平均價7.18元沽出6萬股,短炒獲利約6萬元。同日,阿莊以平均價每股4.8元沽出聯想(00992)10萬股,獲利8.3萬元。

本地地產股全線上揚,長實(00001)、新地(00016)、恒地(00012)股價均創五十二周新高,就連本月上旬阿莊推介嘅美聯物業(01200)亦創五十二周新高。相對而言,平保(02318)及中國人壽(02628)表現較為落後,短線可以多加留意。

嚟緊又有一批新股登場,其中恒大地產(03333)已為城中焦點,事關多位股場大孖沙均已表態入飛認購,另一隻可以留意嘅新股係已開始接受認購申請、同屬內房股嘅禹洲地產(01628)。禹洲由大摩做保薦人,招股價範圍2.7至3.7元,集資額介乎16億至22億元。公司擁有土地儲備350萬平方米,其中近半位於廈門,據講已獲世茂房地產(00813)主席許榮茂及兩家上海A股公司─廈門建發及廈門國貿以基礎投資者身份認購。

海西概念可堪憧憬

由於未來兩岸經濟發展可堪憧憬,中央已明確表示,要建立海西經濟區,屆時福建廈門將會成為重點發展嘅城市;另外,二○一一年廈深鐵路高速鐵路啟用,將加強福建及廣、深沿岸之間嘅經濟活動,有利廈門房產發展,加上禹洲招股價範圍並沒有如早前幾隻潛水新股咁「開天索價」,可考慮入飛認購。

講開海西概念股,阿莊組合中持有嘅廈門港務(03378)昨日亦見異動,股價升6%,收報1.58元,成交2,455萬股。

據廈門港口管理局統計顯示,截至九月份,廈門港貨物吞吐量完成8,093萬噸,估計下月可突破1億噸,成為福建第一個億噸大港。由此可推斷,下半年廈門港務嘅港口碼頭業務將加快復甦,若短線股價升勢持續,便確認突破八月初以來嘅下降軌,可睇位加注,博上2元。

阿莊