本文重點
香港人一向壓力大，所以尋日滙豐搞咗個座談會，等啲中小企減吓壓鬆一鬆，搵咗啲專家教吓佢哋點樣面對壓力，太子順口問吓尋日做主禮嘉賓嘅滙豐銀行香港工商業務主管陳樑才，做滙豐壓力係咪好大，佢就話香港地做乜嘢都有壓力o架喇，平時佢會聽歌同埋打波減吓壓。
陳樑才話鍾意聽啲柔和嘅旋律，最鍾意就係以前隊「Carpenters」。「木匠」樂隊係一隊兄妹合唱團，不過妹妹好早就去咗。
打高球聯誼鬆一鬆
另外，陳樑才同好多「賓架」一樣都好熱愛打高爾夫球，佢仲話同啲客一齊打波除咗聯誼之外，仲可以輕鬆一吓添。
中小企係所有地區經濟嘅基礎，香港地出名工時長，生活擠迫，乜嘢都係密集式，所以好易會同人產生摩擦，人與人之間問題增加，好自然就會產生壓力，所以陳樑才尋日都特登提吓「有壓力」嘅經典人物巴士阿叔，希望可以透過個座談會，同埋滙豐自己個網上中小企支援錦囊，加強中小企員工嘅抗壓能力、保持身心健康，尋求生活同工作中得到平衡發展。