唔敢講美國經濟是否已觸底，尤其失業率仲未有見頂迹象，但是股市投資從來同股市動向唔同步，至少走先三至四季。睇番今日道指一○年預期市盈率大約16.1倍，和過去二十年的高低位28倍及7.6倍相比，唔稱得上貴，但市帳率大約只係2.7倍，比平均的3.2倍低，也接近十二年低位，加埋現時利率之低，股市被低估，要比高估的可能性大，淡友點唱淡都徒勞無功。

一太中線值得留意

趁市旺，又係伸手好時機，廢銅回收商長盈（00689）配售8.2億股，每股作價0.225元，集資1.775億元，大股東及關連人士持股由41.6%降至34.72%；另外，第一太平（00142）五供一，每股供3.4元，準備擴大菲律賓及東南亞礦務投資，以及旗下Metro Pacific在菲島的基建投資。以一太大股東在菲印的關係，加埋市場對新興市場較歐美復甦來得更早的共識，估計消化唔準備供股的沽盤後，一太中線仲有留意必要。

業績表現跑輸同業

第三季祖國汽車業數據唔錯，駿威（00203）、東風（00489）等續有追捧，連華晨（01114）都見火燒冷灶，急升一成二，收報1.01元。九九年上市的華晨招股價29.53元，經拆細後，等於今日1.48元，揸十年仲要輸三成。

金融海嘯下中央為救活汽車業，今年一籮籮傾斜政策出台，又下鄉又補貼，汽車業人人大豐收，唯獨華晨反而出盈警，結果半年蝕掉3.86億元人民幣。業績欠佳，除了因為財務成本增加外，也為中華轎車商譽作出近3億元人民幣減值，最令人失望嘅係寶馬合營貢獻仲係似有還無，得1.16億元人民幣，中華轎車開始落伍就唔使多講，寶馬在內地要豪要威的消費文化下，本來大有可為，偏偏產量同效益都低，擴產又只聞樓梯響，不見有人來，都係死因之一。

唔賺錢無PE睇，華晨市銷率（PS）0.27倍，比內地同業平均0.95倍低一截，顯然要解決點樣有效將銷售額變成利潤，最好當然係同其他大廠整合，以其預期市帳率0.68倍，應該有唔少內地汽車業者對華晨有興趣。或者唔係長線持貨之選，但炒內地車業大豐收，有閒錢進行購併，華晨可以博一博。