阿莊喺上周買入嘅田生集團（08136），昨日一度抽高至0.51元，已於0.5元悉數沽出80萬股，短炒獲利8.5萬元。喺前日買入嘅中海油（00883），昨日收市報12.02元，升1%，慢火煎魚，會繼續持有。

唔少基金股股價迭創五十二周新高，恒安國際（01044）股價已升穿50元、偉易達（00303）一度高見70元、比亞迪（01211）曾高見78.05元、利豐（00494）亦曾見34.9元。

二三線股趁勢突圍

阿莊長揸嘅北京控股（00392）亦一度升至48.05元，料短期可叩50元大關。相比之下，同屬基金股嘅思捷環球（00330）股價表現落後，可納入收集名單之內。

除了大價股之外，唔少二、三線股亦趁旺市突圍。前日推介嘅駿威（00203），昨日派息除淨，收報3.79元，升3%；一直斯人獨憔悴嘅華晨（01114）亦終於發圍，收報1.01元，升12%。

國策支持長炒長有

本欄周二推介嘅中國燃氣（00384）停牌，有待公布戰略合作事宜，已跟進者可以耐心等候好消息。

此外，新能源股中，久違了的中電新能源（00735），昨日以全日高位0.53元收市，升幅19.1%，成交1.4億股。

其實，內地政策明確支持新能源及可再生能源嘅發展，對於類似中電新能源這類細價股，帶來長炒長有嘅炒作藉口。不過，有別於其他齋炒概念嘅細價股，中電新能源有身為內地五大電企之一嘅中國電力投資集團作為主要股東之一，加上近年公司落實多項清潔能源投資項目，算係一隻有實際業務支持嘅新能源股。

截至今年六月底止，中電新能源擁有權益裝機容量達815兆瓦，包括風電、水電、生物質發電、垃圾發電、天然氣及燃油發電，以及燃煤發電項目。只是目前公司市值30多億元，但上半年盈利仍只係數千萬元，業務發展尚處投資期，難以用傳統方法計算估值，故見股價走勢較為飄忽。

今年六月以來，其股價一直反覆回落，直至昨日才扭轉跌勢，重上0.5元樓上。純睇走勢，短線若能企穩喺0.5元樓上，可確認突破六月以來嘅下降軌，向上睇0.65元，穿0.49元止蝕。