高盛證券繼調高本地地產股及內地公路股評級後，最近又調高了航運股嘅評級。其中，中外運航運（00368）評級調高至「確信買入」，而中海發展（01138）評級亦調升至「買入」。
過去高盛睇行業復甦嘅眼光都幾準，而事實上，喺中資股之中，今年以來航運股嘅表現算係大落後，亦係時候留意播種機會。
中國汽車工業協會公布嘅數據顯示，內地九月份汽車產銷量再創新高，其中乘用車產銷量首次超過100萬輛，達到101.5萬輛，同比增長83%，而今年首九個月，內地汽車銷量達到966萬輛，同比增長34%。
由於九月份乃內地汽車傳統銷售旺季，按月表現良好，係市場預期之內。早喺今年中，已有內地汽車行業組織估計，今年全國汽車銷量有望挑戰1,200萬輛。本來，阿莊亦擔心下半年內地汽車銷量，特別係乘用車市場未必能維持強勢，但如今見到九月份銷售數據，亦不得不承認，市場情況確比想像中好。
有力維持穩定派息
喺內地汽車股之中，近月以比亞迪（01211）及吉利（00175）股價表現最亮麗。相比之下，駿威（00203）嘅股價表現顯得落後，主要原因係駿威旗下產品以中檔轎車為主，但今年增長較快嘅產品卻集中喺小排量汽車。但不能忽視嘅係，過去駿威嘅盈利表現相對穩定，截至今年六月底止，公司手頭現金達49億元人民幣，借貸對權益總額比例維持喺低水平（0.01%），有能力維持穩定嘅派息政策。
今年上半年，駿威實現純利11.78億元，保守估計全年度可維持正增長，現價計預測市盈率十一倍。若今年下半年旗下廣州本田及廣汽部件銷情優於預期，預測市盈率可降至十倍樓下，計落呢啲位上車至少可以安心持貨。
自八月以來，其股價進行整固，喺3.3元水平現承接，如今似在整裝待發。咁啱公司派發中期息每股3分人民幣將於本周四除淨，雖然派息唔算多，但此時跟進，亦可博財息兼收，上望4.2元，止蝕位3.1元。