合和實業（00054）早排宣布，聯席董事總經理胡文新調任董事總經理，原來今年亦係湯馬士（胡之洋名）畢業後加入公司第十年，尋日佢出席公司股東會後被問到正式「坐正」有咩感受，佢就好謙咁話希望未來十年公司可以做出更好成績。
講開合和，好多人都會諗起港珠澳大橋，因為合和多年嚟積極推動呢個項目，並爭取參與興建。湯馬士尋日就自爆，舊年知道大橋會由三地政府牽頭建設之後，曾經一度諗過將合和基建（00737）私有化。
但當時正值金融海嘯，合和覺得呢個時候提私有化唔係咁恰當，最終選擇將預留用喺港珠澳大橋嘅資金，大派特別息回饋股東。