曾多次參與WFE會議

據了解，WFE主席、副主席等職位係以交易所做單位，故周文耀退休，係咪順理成章由夏佳理或者李小加接任，大家要拭目以待。不過，有資深賓架就對夏佳理接任嘅機會看高一線，因為佢做港交所主席已咁耐，亦曾多次參與過WFE會議。

另證監會主席方正嘅三年任期喺下個星期一（十九日）屆滿，政府通常會喺最後一日才公布係咪續約。不過，太子留意到，證監會個網頁最新活動消息一欄，方正喺十一月已安排出席兩個活動，一個係十一月十日由財務策劃師學會舉辦嘅財務策劃周年會議，另一個係十一月二十四日傑出董事獎頒獎典禮。睇嚟，佢續約已坐定粒六。