港股硬闖二萬二關前先抖氣，尋日恒指跌近1%，藍籌股幾乎全面下跌。不過，大市投資氣氛改善，二三線股仔見異動，志強上周五沽咗筆克（00752），見尋日一早裂口高開，一開市以1.41元追番10萬股，今次破頂，等1.7元食胡。至於茂業（00848）走勢亦唔錯，晨早擺定2.1元買入10萬股，呢隻追落後，有條件破五十二周高位。連埋國美（00493）持有三隻股，見個市有氣氛，唔博等幾時？
二三線股仔炒作氣氛漸趨熱鬧，尋日中能控股（00228）升逾一成，高收0.495元，成交額仲大幅增加，完全配合升勢，上升動力增強，料升勢有餘未盡。集團變身天然氣企業，在今年二月中跟中石油集團訂立合約，共同開採於新疆的石油及天然氣。該項目的天然氣儲量約260億立方米，按目前市場天然氣邊際利潤約每立方米0.4元人民幣計算，粗略計其潛在價值已過百億元。
由於早前中能公布收購延期至十一月底，其股價便由高位下滑，但志強相信交易可如期完成，所以在十月份先偷步炒上唔出奇。最近，前中國石油副總裁加入中能的董事會，志強更加肯定中能與中石油集團能順利合作，前景值得睇高一線。