上星期超級黃金周，儘管豬流感依然肆虐，不過本地零售業卻係丁財兩旺，六福（00590）、周生生（00116）及堡獅龍（00592）透露的銷售增長數字，都比分析員預期為佳，內地豪客掃高豪宅之外，對首飾興趣一樣咁濃，有報告話珠寶業類股份有三成增長，最標青的周生生升近7%，成了逆市奇葩。

有一段時間，筆者將化工股放入櫃桶底當睇少隻，中石化（00386）旗下三大上市化工企業之一的儀征化纖（01033），尋日收市後為第三季業績發盈喜，相信唔多唔少對短期股價有激勵作用。平心而論，儀征上半年早就虧轉盈，第一、第二季各賺3,630萬元（人民幣．下同）及2.74億元的勢頭，第三季「繼續」賺錢其實唔應該令人太意外。留意先前兩份季度業績，第一季聚酯產品銷售量41.3萬噸，第二季則為44.4萬噸，比去年同期微跌0.1至0.2%，由蝕變賺，講到尾唔係經營超卓、市場需求大增或者其他內在原因，只係原材料價格下滑幅度比產品價格更大，令毛利改善所致。

私有化炒完又炒

炒開儀征嘅股民，斷估唔會因為管理往績作為捧場理由，儀征可算是周期股典範，五年往績，完全係賺粒糖輸間廠格局，○四年開始分別係賺2.4億、蝕9.67億、賺4,047萬、賺2,231萬，以及○八年大蝕16.4億，咁嘅往績，除了每次炒周期尾由蝕變賺之外，次次都係賭母公司私有化。

中石化五個乖仔，鎮海及燕化已回歸母親旗下，剩低上石化（00338）、冠德（00934）及儀征三個。上兩次私有化作價都响兩倍市帳率樓上，預期儀征市盈率應可出現正數，筆者估介乎十二至十三倍，○九年市帳率1.5倍左右，在1.6至2元橫行近兩季後，股價正等候突破。結合所有因素，儀征肯定非長揸佳選，但短期試一試，博股價突破風險應該唔大。