表演跳舞樣樣齊

Winkelmann喺信中講到，今年嘅晚宴將會係首次棄用正規形式，而較為着重聯誼性質，因為會員寧願晚宴多啲時間傾偈，少啲時間進行儀式活動。

為咗配合今年嘅新形式，今年晚宴只會邀請少量主禮嘉賓。晚宴仲會有會員同藝人嘅娛樂表演，又會加插跳舞、遊戲環節，仲會設置一個漫畫檔口，替在場人士畫牛仔、牛女肖像。

更重要嘅係晚宴每位只收480元，係原價720元嘅三分之二。Winkelmann話，今次晚宴只係公會其中一個轉變，證明佢哋有聽會員意見。

公會今個禮拜日亦舉辦卡拉OK比賽，公會會員同註冊學生都可以參加，贏咗仲有機會代表公會參加專業人士界別唱K比賽，比賽喺十一月一日舉行。