大家可能有所不知，其實鎳金屬近日升幅較黃金白銀仲勁，由前周五嘅每噸17,285美元，連升五日，至19,495美元，升幅13%。

中國鎳資源（02889）係中國最大嘅鎳金屬同不銹鋼基料嘅主要生產商之一，但最近股價並未反映鎳價大升嘅因素，反而喺1.4元低水平橫行，嚴重跑輸金股同其他金屬股，值得追落後，初步上升目標前高位1.94元，仍較○七年嘅5.46元跌近七成。

經濟好轉需求大增

環球經濟好轉，對工業金屬需求自然大增，其中含鎳嘅特鋼市場更供不應求。中鎳於八月後已經全面恢復生產，而其新鎳金屬廠房亦將於明年開始投產，首階段年產能約為1.6萬噸，預期逐步擴展至6萬噸，其高毛利率將令集團盈利大升。

中鎳兩年前收購印尼鎳礦後，將獲得二十九年鎳金屬嘅穩定供應，除自給外，亦可向外銷售。

鎳價大升，對中鎳非常有利。走勢上亦已轉強，股價重上10日同20日線，MACD出現牛差，正蓄勢待發，向目標價1.94元推進。