上周反映乾貨運費走勢嘅波羅的海指數持續反彈，看來隨着美股反覆回揚，加上中國「保八」在望，大家對經濟復甦前景展望信心增強。與出口市場有直接關係嘅航運股，上周反彈勢強，若短期升浪持續，港口股亦有運行，上周推介嘅大連港（02880）、走勢相對落後嘅招商局國際（00144），都可以多加關注。

放大圖片	放大圖片	放大圖片

近期國際金價喺突破每安士1,000美元後，勢如破竹，而國際油價亦見回勇，紐約期油重上每桶70美元樓上。

其實，計埋美元貶值，喺油商眼中，依家油價仲係好平，若然嚟緊經濟復甦帶動石油需求回升，油價仍具上升空間。

油價上升直接受惠

中海油（00883）專注石油上游業務，受惠於油價上升嘅程度較中石油（00857）為大。今年上半年，中海油嘅油氣淨產量達到105.8百萬桶油當量，同比增長15.2%，但由於期間油價下跌，故合併淨利潤同比下降55%至124億元人民幣，公司維持派發中期息每股0.2元。

國際油價喺次季反彈過後，第三季趨於穩定，已確認石油行業安度「寒冬」。上半年，中海油平均實現油價為每桶49.35美元，而第三季國際油價大致喺每桶60至70美元水平，只要末季能保持相對穩定，下半年平均實現油價勢必高於上半年，配合公司加大勘探及開發項目力度，新項目順利投產，盈利將重現增長動力。

阿莊深信，國際油價表現，有如全球經濟形勢的一面鏡子，若然大家對於未來數年嘅經濟形勢抱有信心，以中海油目前嘅估值，確實係一隻好值得投資嘅優質中資股。