二三線股仔又唔係熱炒，志強所持國美（00493）係就係跟個市上番唔少，但未有耐見家鄉。至於尋日買入的筆克（00752）仲吹脹，逆市下跌，但見佢守得住1.3元，即管睇多日，今日都唔行就可能短炒完畢，都要沽出計數無得等。

華晨汽車（01114）尋日表現唔錯，在成交增加配合下，股價升逾7%，扭轉之前弱勢，相信調整已告一段落，可以吼位炒番轉。之前華晨公布上半年業績，因需要為中華牌轎車無形資產減值逾3億元人民幣，令上半年業績盈轉虧，對股價帶來壓力。

被購併機會大增

不過，華晨上半年虧損業績屬預料之內，加上中華牌轎車業務可受惠於內地轎車市場復甦，輕型客車銷售則可得益於中國政府對農民提供補貼的舉措，華晨前景仍值得睇高一線。

另一方面，華晨差勁的業績，或令集團被購併的機會大增，今年內市場已多番傳出其被購併的傳聞。其控股股東年中以每股0.43元作價認購13.179億股，亦可視為正面因素。

不過，要留意嘅係華晨相對內地其他汽車生產商，競爭力較弱，志強認為宜炒不宜坐，若要作長線投資，華晨並非內地汽車股首選。短炒目標0.95元，穿0.8元止蝕。