澳洲加息，踏出退市第一步，為其他經濟開始好轉的國家打開退市大門，對美元及整個投資環境影響深遠。由於復甦滯後，美國無條件同步加息維持匯價，美元弱勢貨幣身份被進一步肯定。

香港金融政策無自主權，港息跟隨美息，但經濟卻追隨祖國，開始走出谷底步向復甦，在這情況下，股市及資產市場做好完全不教人感意外。筆者不想預測股市升浪未來可以維持幾耐，唯一肯定嘅係，揸現金會相當蝕底，預期投資市場未來半年至一年，會更加熾熱。

在低息環境下，投資者惟有更積極維護手上鈔票的購買力，生意淡薄不離賭博，回想○七年港股巔峰期，每日成交額持續在1,500億至2,000億元水平，對比之下，今日港股炒風未算瘋狂。 而要搵能夠受惠於股市交投趨旺嘅公司，第一隻諗起嘅自然係港交所（00388），至於尋日公布業績的大福證券（00665），同樣引起筆者注意。

業績與港股成交同步

由於更改財政年度年結日關係，尋日大福公布截至六月底止十八個月業績，純利1.89億元，睇番頭十二個月賺1.12億，換句話說，今年一至六月賺7,700萬元，對比今年三月中前股市仲係死氣沉沉，股東對業績應該感到滿意。

大福往績與港股成交其實十分同步，○六年賺1.72億元（十二月結），○七年由於股市炒風最烈，大福當年盈利即急增至4.84億元，到○八年又回到1.12億元。今年上半年港股每日平均成交583億元，大福半年賺7,700萬，以下半年港股成交約600億元計，大福全年交出1.5億元利潤應該唔難，市值21.3億，相當於市盈率14.2倍，若然股市的成交逐漸上升，大福估值會更低。再睇公司派息慷慨，每年將45至50%盈利派畀股東，加上CEPA開通後，集團積極拓展內地客市場，前景唔錯，3元左右買，畀半年至一年時間，贏面唔細。