阿莊持有嘅聯想（00992），終於醒神番啲，昨日曾高見3.95元，收報3.9元，升5.98%，仍期待季內此股會有好表現，短線先睇4.15元阻力位。另外，阿莊喺上周四見報推介嘅田生集團（08136）亦見異動，遂趁熱鬧以平均價0.39元買入80萬股，該股昨日升18.57%，收報0.415元。
回說新股，前日掛牌嘅華潤水泥（01313），昨日即告「潛水」，收報3.8元，跌2.5%。反而，創業板全配售新股中，繼中國生命（08296）大升後，昨日掛牌嘅永恒國際（08351），一度升上1.28元，收市報0.405元，較發行價0.25元仍高出62%，股價波幅之大，令人咋舌，最慘喺全日成交額1.26億元中，唔少都係喺高位成交，若然即市入市高追，睇怕即日便要「打靶」離場。所以學香港股神話齋，咁多股好搞，都係暫避新股為妙。
平常心看待上落市
澳洲加息被視為經濟復甦的象徵，不過，阿莊始終認為，一個銀仔有兩面，問題在於大戶要開邊一面。澳洲加息，亦可視為各國政府「退市」行動的開始，若然各國只顧各自盤算，缺乏協調，對於當前嘅全球經濟復甦，有害冇益。所以話，雖然技術上股市走勢有改善，但保守起見，都係平常心看待上落市。
中資股方面，內房股整固過後，又可以重新關注。中國海外（00688）將於本月廿一日公布第三季度業績。翻查資料，今年上半年，公司實現營業額154億元，同比增長44%；純利30.4億元，增長31.8%。期間，公司喺內地嘅銷售金額和面積均刷新紀錄。
至於七、八月，公司實現嘅房地產銷售額分別為40.9億元及36.1億元，同比增長1.1倍及2.1倍。如無意外，第三季度業績應該唔會差得去邊。
近兩周，中國海外股價回穩向上，昨日收市報17.62元，升2.56%。且看季度業績表現，能否帶動股價打破過去三個月嘅悶局，再次挑戰20元關阻力位。