雖然加息來得比預期早，但其實由經濟數據看，澳洲失業率由去年二月最低點3.9%，飆升至今年三月最嚴峻時期的5.7%後，已經無再惡化落去，墨爾本大學的預期消費物價指數，亦已從三月低位2.2%升至九月份見3.5%，通脹預期開始浮現；而且澳洲以資源出口為主，在近月商品升浪中，預期會進一步加速澳洲經濟復甦，提前加息其實都唔係壞事。尋日澳紐股市照升如儀，可見央行退市，亦唔一定係股市嘅末日。

亞洲區勢掀加息潮

今次澳洲加息後，估計唔少亞洲新興國家好快會照辦煮碗，避免通脹失控。高盛出報告，預期明年首季印尼央行有條件加息1厘，菲律賓央行第二季加50點子，馬來西亞及泰國等到第二季後，估計分別有50點子及75點子加息幅度。

尋日恒指午市突然飆升382點，收報20,811點，成交回升至565億元。唔少「專家」言之鑿鑿，估跌穿50日平均線的港股，最低限度要返到19,500點樓下，但股市有趣之處，就係愈多人睇淡愈唔會跌。如果澳洲及亞洲新興市場出現復甦並有條件加息。相反，美國經濟繼續低迷，低息周期較其他國家滯後，港元要盯緊美息，勢必激起投資泡沫繼續愈吹愈大，港股要跌，睇怕唔易。

高煤價下，過去兩年，內地電力股都無運行，連帶行業上游的電力設備供應商都齊齊吊鹽水。反而，太陽能、風電股及其他可再生能源設備股，多得國策傾斜，炒到飛沙走石。

提高核電業務比重

哈爾濱動力（01133）以傳統電力設備供應為主，上半年業績唔好係意料中事，半年賺2.16億元（人民幣．下同），比去年大幅倒退61%，新接定單132億元，同樣大跌62%。本來乏善可陳，不過回顧○七年行業巔峰期，股價見29.4元，今時今日輾轉得番7.57元，跌掉七成四，反之○九年預期盈利，只係比高位折半，估值應已充分反映短期沉悶業績。

隨着原材料價格大幅回落，已抵銷部分負面因素，但哈動不忘投市場所好，近一年逐步增加核電設備業務比重，希望未來兩、三年內，把風力、水力及核電業務收入提升。論估值，哈動遠比上海電氣（02727）、東方電氣（01072）為平，火電業務最壞時刻已過，可再生能源發展潛力幾乎完全未反映在估值中，與其用幾十倍PE天價買歷史短、規模細的可再生能源概念股，倒不如諗番四平八穩嘅哈動。