昨日反彈市，究竟代表短期市況已完成調整，抑或只係本周五A股復市前，大戶伺機推高指數方便出貨？阿莊亦說不準，惟有見步行步，短線小注即市跟炒無妨，但大動作最好都係等到A股復市方向明朗後先至好落手。

太陽日誌

放大圖片

新股華潤水泥（01313）首日掛牌，險守招股價3.9元，成交23.6億元。憑着老牌紅籌牌頭嘅威力，總算頂得住。

美製造業初現曙光

美國供應管理協會（ISM）公布，九月份非製造業景氣判斷指數由八月份嘅48.4上升至50.9，乃去年五月以來嘅新高，亦結束連續十一個月低於景氣好淡分界線50嘅局面，這無疑有助紓緩投資者對美國經濟嘅悲觀情緒。

全球領先手機及無線通訊裝置代工商富士康（02038），來自歐、美市場嘅銷售額佔總銷售額比例合共超過四成，受金融海嘯影響非輕，今年上半年更轉盈為虧，蝕1,900萬美元。

手機這類消費品，較直接受經濟景氣影響，在經濟前景樂觀嘅年代，手機改朝換代亦特別快；但撞着經濟不景，搵朝唔得晚，手機銷售下降，整個手機供應鏈製造商都要面對產品需求及價格下降嘅壓力，富士康亦不例外。

若然未來見到更多經濟數據支持美國經濟回穩，對於富士康而言，當然係正面，但更重要嘅係，近年公司將焦點轉移至內地市場，未來亞洲市場佔銷售額嘅比例尚有上調空間，配合內地致力推動內需嘅政策方向，所以阿莊亦唔只一次講過，呢隻股唔應該再睇得太淡。

受惠手機需求回升

適逢近日美林發報告亦指出，富士康將受惠手機需求回升，故將其二○一○年盈利預測上調8%，投資評級由「跑輸大市」調高至「買入」，目標價5.8元，相等於預測市盈率二十八倍。

今年次季以來，富士康嘅股價表現一直跑輸大市，某程度已反映歐、美業務表現。若然有更多數據支持海外市場氣氛好轉，其股價爆發力不可忽視。再睇走勢，股價已橫行五個月，正等候消息向上突破，若有閒錢，可以考慮先買入首注，待突破5.5元再追貨，目標叩6元關，穿4.7元止蝕。