Rose喺滙豐工作已有一段長時間，同客戶建立了好好嘅關係，加上佢亦係一個人才，具有豐富嘅企業銀行業務經驗，滙豐又點會咁易放佢走？所以Rose會以顧問身份繼續留喺滙豐幫霍嘉治手。

霍嘉治明年二月出任嘅職銜為個人理財及工商業務主席，好似同Rose專長嘅企業銀行扯唔上關係。不過，呢個世界所謂一理通百理明，中小企都會變成大企啦。而且Rose喺銀行業打滾多年，憑佢嘅閱歷，絕對會係一個好顧問。

滙豐銅獅複製駐滬

講起滙豐，一對係威係勢嘅銅獅子史提芬(Stephen)和施迪(Stitt)，多年來成為滙豐嘅標誌。由於滙豐大舉進攻神州，呢對獅子孖寶將會複製，運到上海放置於明年上半年開幕嘅滙豐中國上海新總部大樓。