本文重點
華潤集團董事長宋林之前同太子講過，佢哋上上下下嘅員工一齊搞緊「希望小鎮」。廣西搞嘅第一個「希望小鎮」已經起到七七八八喇，海南島石梅灣起緊第二個，投資總額同第一個都差唔多，大家都係5,000萬人仔。佢哋首個希望小鎮就幫到1,500個貧困人士，希望今次可以幫到更多人，咁就心滿意足喇。
宋林：目標每省一個
希望小鎮呢個模式係由華潤集團首創，亦都係宋董親自構思，希望透過公司同員工捐錢出嚟起呢類小鎮。由華潤創業（00291）將良種番茄同豬仔帶入去，豬仔長大同農產品收成後，再賣番畀華潤超市；華潤水泥（01313）同華潤置地（01109）就幫村民做規劃同埋起新村，就連員工都出錢出力做義工。
佢哋第一個希望小鎮係喺廣西百色永樂鄉西北樂村做試點，宋董話未來嘅目標係每個省搞一個喎。