06/10/2009

播放本新聞相關短片
查詢股票編號

Fundman睇市:大眾金融估值吸引

末日博士魯賓尼真係似分析員多過大學教授,剛剛又再對股市走勢作預測,認為股市近期升得太快、太多,是U形而非V形的經濟復甦,最終都會令投資市場失望,股市第四季調整難免。

過去大半年升浪,有多少來自對復甦嘅預期?幾多係因為資金氾濫,零息驅趕存款追逐較高回報?根本無辦法合理地量化,唯一肯定的係,當美國失業率飆升到9.8%,創廿六年新高,就業市場逼近年初美國政府壓力測試上限的10.3%最惡劣假設,財金官員即使眼見救市資金流入投資市場炒炒貢,泡沫逐漸形成,都係無計可施,今日要退市,談何容易,而可以預期的是,經濟愈差,股市愈升的情況,短期都唔容易扭轉。

低息期利好細銀行

近期抵買嘅股票愈來愈難搵,任總臨別贈言呼籲銀行注意風險,要收斂按揭貸款減息戰,可是,拆息低企加埋商業信貸疲弱,銀行水浸之下焗住要放錢畀人炒樓都無計。

零息下,細銀行查實比大銀行着數,直接拆入平錢放出街,唔似大銀行即使唔畀利息一班簿仔客,依然都仲負起龐大營運成本照顧一班存戶。

大眾金融(00626)是本地市值最細的銀行股之一,前身是主攻私人信貸的日本信用,自收購亞洲商業銀行後,開始經營綜合銀行業務,亦跟隨大股東馬來西亞大眾銀行正名。

大眾目前市值僅得41.3億元,對比57億元的股東資金折讓27.5%,有人質疑收購亞洲商業銀行保留27億元商譽,不過即使全數剔除,市帳率也不過1.32倍,況且在永隆天價被招行(03968)購併後,香港銀行買少見少,廿多億商譽包含被收購可能性,綜合銀行發展,筆者認為要全數減去是有點嚴苛,估值其實頗具吸引力。

4元樓下收集良機

大眾○七年賺6.65億元,○八年海嘯降至3.58億元,今年首六個月因貸款減值等損失大增近五成六,中期純利1.18億元,跌五成三,但經已比去年下半年的1.08億元有輕微改善,尤其客戶貸款持平下,淨利息收入有近8%增長,可見低息對其幫助唔細。貸款質素沒有再變壞,配合淨利息收入改善,明年市盈率唔夠十倍,筆者相信4元樓下會係絕佳的收集機會。

史提芬