和記行（00720）近月股價有異動，昨日升8.6%，報0.63元，公司正積極推動內地高檔配飾業務，不妨留意短期內圍繞呢方面是否正醞釀好消息。

和記行醞釀好消息

翻查資料，和記行喺七月初就配售事項發出通告，其中配售代理會喺公司股東特別大會（已於八月六日舉行）起計三個月內，「按竭誠基準進行配售事項」。然則，如市況配合，估計相關配售將於下月初前完成。

本周五A股復市，估計此後市場焦點將放喺九月份CPI數據，以及企業第三季度業績表現身上。阿莊現階段嘅睇法係，短期美股和港股走勢已經轉弱，所以唔好爭在嗰三數日，最好係等A股復市，多啲入市指引，先至作入市部署。

大摩羅奇話，要提防美國經濟再次走下坡，並擔心會引發對華嘅貿易戰，又指中國應該改變過往依賴出口嘅做法，未來宜推動社會保障，以達致推動內需，帶動經濟增長嘅長遠目標。

阿莊相信，中央政府亦深明此理，近期致力推動嘅醫療改革，亦係朝着呢個方向行事。所以，從呢個角度睇，未來一段時間，圍繞內需概念嘅股份，會較具防守性。

早前阿莊沽出雨潤（01068），但保留了蒙牛乳業（02319），亦正正係考慮到投資組合不能沒有內需股，所以惟有二選其一。

講開蒙牛，市場都在期待，蒙牛同新主中糧集團，攜手鞏固喺內地乳業嘅「霸主」地位。最近中糧集團董事長寧高寧接受內地傳媒訪問時便一再強調， 從產業鏈上，入股蒙牛有好大嘅協同性，如今蒙牛有了一個大股東，而中糧亦有了一個很好嘅發展乳業平台，成就「雙贏」局面。

夥拍中糧締造雙贏

阿莊相信，下半年蒙牛嘅整體業務將完全走出「毒奶事件」嘅陰影，而展望明年，與中糧集團嘅合作成效，會為業務增長注入新動力。目前蒙牛股價已重返「毒奶事件」出現前嘅水平。

客觀而言，經此一役後，行業競爭局面更有利於大型乳品企業嘅長足發展，加上跟中糧集團「一加一大於二」嘅效益，經過第三季嘅收集期，第四季股價有條件發力上攻，故會繼續耐心持有，靜候明年豐收。

阿莊又有好介紹，東方報業集團網站《on.cc》由尋日起喺Money18網站（網址：money18.on.cc）提供免費即秒股票報價服務，網站更有第一時間財經新聞資訊及市場熱炒股份推介，內容包羅萬有，冀幫助讀者們成為股壇長勝將軍。